翼想天開創意設計工坊摎客家纏花

【文、圖∕薛常威∕國立中央大學客家語文暨社會科學學系在職專班碩士】

 

　　「纏花」係用線个纏到紙版，無斯鐵線頂高，摎多種个花葉結合起來个人造花个一種手工藝。在台灣早期北部客家庄當流行，客家話安到「纏花」無斯「線花」。台灣早期農業社會學老人嫁新娘个時節頭那頂愛插一個頭花，毋過學老人大體係用紅色，客家人用色斯較多樣。除忒用到新娘頭花，「纏花」還做得做歸大把放玻璃櫥肚，放到公廳做供品，乜做得放到細人个帽頂，無斯掛間房肚看靚，這下這種手工藝較少看著了。

　　



　　「翼想天開創意設計工坊」个創辦人Winwing楊凱竹小姐，厥姆係楊梅个客家人，背尾正搬到花蓮，所以楊小姐係客人乜係花蓮人。佢本來研究所係讀

　　生物科技个，毋過佢對金屬工藝、金工設計當有興趣，斯走去拜師學手藝，乜考著2011年國家乙級金銀珠寶加工技術士个牌。正開始斯自家擺攤仔，佢毋係單淨賣自家設計个作品，佢乜摎客家傳統个「纏花」重新設計，變出還較多變化个纏花福飾、新郎胸花、新娘頭花。


　

　　楊小姐2008年開始經營Winwing創作，2014年進駐花蓮文化創意園區，2015年轉到自家个故鄉花蓮開了「翼想天開創意設計工坊」，2016年斯得著客家青年創新發展獎。佢用花蓮个豐田石、瑞穗溫泉石等在地个材料，結合珠寶、金屬工藝，用花東特色摎客家文化來發想、創作，創立一個新个品牌，也開班教學生，分享佢愛个金工藝術。

　　

　　雖然大家會試著花蓮人口較少，無恁多人消費。毋過「翼想天開」个楊小姐，用佢个熱情，摎故鄉花蓮个山水，客家个纏花結合共下來做設計，還過用个係在地个材料。還有佢乜在花蓮、宜蘭个職業訓練班，教後生人金工、纏花个手藝，分後生人提高自家就業个能力。
　　
薛常威先生 聲檔 — 翼想天開創意設計工坊摎客家纏花（海陸腔）





　

▲BACK